തുടച്ചു വെടിപ്പാക്കി ചാവി കൊടുത്ത് മിനുക്കി
ചലിപ്പിച്ച് മേശപ്പുറത്ത് സ്ഥാപിച്ചു
ഒരിക്കൽ കൃത്യം മണിയടിച്ചു മുന്നോട്ടു പായിച്ച
ആ ക്ലോക്ക് .. ഒന്ന് കാണാൻ
പിന്നെ ആടിക് ടിക് ശബ്ദം
എൻറെ കാൽവേഗങ്ങൾക്കും നെഞ്ചിടിപ്പിനും
കൂട്ടിരുന്ന ജീവൻറെ താളം.. ഒന്ന് കേൾക്കാൻ
“ഇക്കാലത്ത് ആരെങ്കിലും ഈ പഴഞ്ചൻ ക്ലോക്ക്
ഇവിടെ വെക്കുമോ”
“മണി നോക്കാൻ മൊബൈൽ പോരെ”
പരാതികൾ ഒഴുകി
വീട്ടിലാകെ അലോസരമായി
“ഒന്ന് നടു നിവർത്താൻ കിടക്കുമ്പോൾ
ഈ ശബ്ദം ഉറക്കം കെടുത്തുന്നു”
അമ്മയും കൂട്ടത്തിൽ ചേർന്നു
ദൂരെ കളയാം ..എറിഞ്ഞുടയ്ക്കാം ..അല്ലേൽ
വീണ്ടും തട്ടിൻപുറത്ത് ഒളിപ്പിയ്ക്കാം ..
ഞാൻ നടന്നടുത്തു ..കയ്യിലെടുത്തു ..
സൂക്ഷിച്ചൊന്നു നോക്കി ...
നീറി നീലിച്ച ഓർമ്മ ഞരമ്പുകൾ
കെട്ടു പിണയുന്നു; വരിഞ്ഞു മുറുക്കുന്നു;
ഞാനതിൽ തടഞ്ഞ് വീണ്തണുത്തു
ഒപ്പം സൂചികളും.