ജ്വലിക്കും കോപം തെല്ലു
ശമിച്ചീടുമ്പോഴുള്ള-
മലിഞ്ഞോ മഴത്തുള്ളി
യൊന്നൊന്നായ്പതിക്കുന്നൂ.
കുറയുന്നില്ലെന്നാലു-
മാളിടാൻ വെമ്പീടുന്നു
പറയാനറിയാത്ത
ജീവിതാഘാതംവീണ്ടും
കോപമോ പ്രപഞ്ചത്തിൻ
താപമോ മുജ്ജന്മത്തിൻ
പാപമോ പ്രചണ്ഡമാം
വിഹ്വലപ്രകൃതിയോ
എന്തുഞാനോതാൻവാക്കി-
നർത്ഥങ്ങൾതേടീടേണ്ടും
സന്തതോദ്വേഗത്തിൻറെ
വെമ്പലേ ചുറ്റുംകാണ്മൂ
വിധിയെപ്പഴിക്കാനോ
വിശ്വാസലക്ഷങ്ങളിൽ
നിധിപോൽകൈക്കൊണ്ടുള്ള
സത്യത്തെത്തേടീടാനോ
എന്തെനിക്കജ്ഞാതമാ-
ണെൻറെ ചിന്തകൾപോലും
പിന്തിരിഞ്ഞൊളിക്കുന്നു
നിശ്ചലനാകുന്നൂ ഞാൻ.
ഒന്നെനിക്കിന്നും വ്യക്തം
ഞാനൊരുകളിപ്പാവ
ഒന്നിലുമൊതുങ്ങാത്ത
ചൈതന്യമൊന്നേസത്യം
ശക്തിയാമാവൈഭവം
നിശ്ചയിക്കുന്നൂസർവ്വം
ശക്തനായ്മാറുന്നൂഞാൻ
ചലിക്കാൻതുടങ്ങുന്നൂ
പെയ്യുമീമഴയ്ക്കൊപ്പ
മൊഴുകീടട്ടെ ദു:ഖ
മെയ്യുമീയസ്വാസ്ഥ്യങ്ങൾ
ചൈതന്യം ജ്വലിക്കട്ടേ.